Süni intellekt tətbiqi Claude-un yaradıcısı olan Anthropic şirkəti ABŞ-da Trump administrasiyasına qarşı məhkəmə iddiası qaldırıb. Dava ABŞ Müdafiə Nazirliyinin şirkəti “təchizat zənciri üçün riskli” elan etməsindən sonra açılıb.
Şirkət kütləvi nəzarət və avtonom silah sistemləri ilə bağlı narahatlıqlara görə müdafiə qurumlarına süni intellekt alətlərinə məhdudiyyətsiz giriş verməkdən imtina etdiyini bildirib.
Kaliforniyada bir federal məhkəmədə qaldırılan iddiada Anthropic administrasiyanın ABŞ Konstitusiyasının söz azadlığını təmin edən Birinci düzəlişini pozduğunu iddia edir. Şirkət həmçinin hökumətin təchizat zənciri qanunundakı hüquqi səlahiyyətlərini aşdığını və dövlət satınalmalarının ləğvi ilə bağlı prosedurlara əməl etmədiyini bildirir.
Dava ərizəsində şirkətin vəkilləri qeyd ediblər ki, Anthropic qanunsuz hesab etdiyi tədbirlərə qarşı hüquqlarını qorumaq və hökumətin “qanunsuz cavab kampaniyasını” dayandırmaq üçün məhkəməyə müraciət edib.
İddia sənədində bəzi federal qurumlar, o cümlədən ABŞ Müdafiə Nazirliyi və müdafiə naziri Pete Hegseth cavabdeh tərəf kimi göstərilib.
Şirkət eyni zamanda Vaşinqtonda yerləşən başqa bir federal məhkəmədə də Trump administrasiyasına qarşı əlavə iddia qaldırmağı planlaşdırdığını açıqlayıb.
Ağ Ev hələlik məsələ ilə bağlı açıqlama verməyib. Pentaqon isə davam edən məhkəmə proseslərinə görə şərh etməyəcəyini bildirib.
Qeyd edək ki, Pentaqonun 5 mart tarixli qərarı ABŞ-da ilk dəfə bir texnologiya şirkətinin rəsmi şəkildə “təchizat zənciri riski” kimi qiymətləndirilməsi ilə nəticələnib. Bu qərar hökumətin Anthropic texnologiyalarının istifadəsini kifayət qədər təhlükəsiz hesab etmədiyini göstərir.
Bir cavab yazın